澳門之旅Part Four - 美食推介！
嶠爸嶠媽早在9年前拍拖開始，已經一年去一次澳門，為既係咩？唔係賭錢呀，竟然係為美食😱😱每年都去，唔厭咩？唔厭架！因為係為左去放兩日假，輕鬆下，食下美食😋😋
今次去都唔例外，帶埋芊嶠同澳洲返黎既表姐去澳門，又點會少得食哩個環節呢？😂😂我地去首先去左氹仔官也街，如果有買旅遊書，都會有介紹，以前拍拖就會搭下巴士去，而家帶住小朋友，都係搭的士方便少少，而且係澳門搭的士都唔算貴！
首先，我地去左食長洲平記既糯米糍，點解香港唔食？其實香港的地都試左，想試下去到澳門有冇唔同，食落真係有唔同，澳門哩個比較凍，嶠媽就係鐘意食個心仲凍既🙈🙈芊嶠就鐘意食個糯米皮，可能煙煙un un，食到成咀都係😝😝嶠媽就試左芒果味，表姐就試左榴槤味，因為嶠媽本身唔好榴槤，所以就冇試😆😆如果大家黎到，可以食到兩個就試哂兩隻味，再話返比嶠媽聽邊隻味好食d🙈🙈
之後就去左位於澳門三盞燈區既雅香/雅馨緬甸餐廳，佢地好得意既，總店叫雅香，分店叫雅馨，不過咩名都唔緊要，最緊要味道一樣。今次要介紹既係佢地既招牌菜 - 椰汁雞麵，佢個麵底係滷水麵，再加埋椰汁雞，簡直係perfect match👍🏼👍🏼每次嶠媽去都覺得半碗唔夠，但得
我同嶠爸又唔會一人一碗，因為驚食得太飽，下餐食唔落😂😂
之後近近地，就行左去盛記白粥，下？食完都又食粥？唔係呀，哈哈😂😂我地入去盛記白粥唔係食白粥，係食綠茶豆腐花，咩話？綠茶禁特別？會唔會苦架先？當然唔苦啦，仲好甜添呀，加埋糖水，一個字，正！食到停唔到口😋😋而且都只係$7/碗，好抵食👍🏼👍🏼未試既下次一定要去試。最記得係嶠爸第一次帶嶠媽去食，嶠媽堅持要叫埋芒果豆腐花，因為驚綠茶豆腐花唔岩食，結果，芒果豆腐花嶠爸一個人食哂，嶠媽只食綠茶豆腐花，所以你地識簡啦？🙈🙈
最後，晚餐去左朋友介紹既李家菜到食，哩間李家菜位於十月初五日街，其實識行都唔算遠，幾近十六蒲索飛酒店架！佢地最出名係卜卜蜆，我地仲叫左個生炒骨，鹹魚肉餅荷葉蒸飯，三樣都好好食！而且埋單都只係$343，真係抵👍🏼👍🏼
Search